काठमाडौ, १८ चैत । त्रिभुवन विश्वविद्यालय बीपी कोइराला लायन्स नेत्र अध्ययन केन्द्रको कार्यकारी निर्देशकमा प्राडा. मीनु चौधरी नियुक्त हुनुभएको छ । 

त्रिवि कार्यकारी परिषदले वरिष्ठ नेत्र विशेषज्ञ प्राडा. चौधरीलाई केन्द्रको कार्यकारी निर्देशकमा नियुक्त गरेको हो ।

प्राडा. चौधरीले बुधबार (आज) कार्यकारी निर्देशक पदबहाली गर्नुभएको  छ । 

प्राडा. जोशीको चार वर्षे कार्यकाल गत असोज १० गतेदेखि नै कार्यकारी निर्देशक पद रिक्त रहेको थियो । 
अर्को व्यवस्था नहुन्जेलसम्मका लागि प्राडा. सगुन नारायण जोशीलाई कार्यकारी निर्देशकको जिम्मेवारी दिइएको थियो । 
छ महिनापछि बिपी कोइराला लायन्स नेत्र अध्ययन केन्द्रले कार्यकारी निर्देशक पाएको हो । प्राडा. चौधरीको कार्यकाल चार वर्षको हुनेछ।

केन्द्रका यसअघिका निर्देशक डा जोशीको कार्यकाल सकिएपनि त्रिवि कार्यकारी परिषदले केन्द्रको कार्यकारी निर्देशक पदमा कुनै पनि व्यक्ति नियुक्त गर्न सकेको थिएन ।

 
यसअघि गत कात्तिक महिनामाप्राडा.इश्वर लोहनीको संयोजकत्वमा कार्यकारी निर्देशक छनौट समिति गठन गरिएको थियो । उक्त समितिमा प्रा.तक्मा केसी र डा.सुदीप पराजुली हुनुहुन्थ्यो । 

त्रिवि चिकित्सा शास्त्र अध्ययन संस्थानले त्रिवि कार्यकारी परिषदमा चौधरी र जोशी दुवै जनाको नाम सिफारिस गरेको थियो।   

उक्त समितिले प्राडा. चौधरी र जोशीको नाम कार्यकारी परिषदमा सिफारिस गरेपनि परिषदले कार्यकारी निर्देशक नियुक्त गर्न सकेको थिएन ।