हुम्ला, २३ असार  । जिल्ला अस्पताल हुम्लामा कार्यरत कोरोना सङ्क्रमित चिकित्सक अमित बिष्टलाई हेलिकप्टरबाट काठमाडौंमा उद्धार गरि ल्याइएको छ ।दुई दिनदेखि श्वासप्रश्वासमा समस्या देखिएपछि थप उपचारका लागि काठमाडौँको एपिएफ अस्पतालमा हेलिकप्टरबाट ल्याइएको हो । 
आठ दिनदेखि कोरोना सङ्क्रमित भएपनि छैटौं दिनबाट चिकित्सक बिष्टलाई कोभिड निमोनिया र फोक्सोमा समस्या देखिएपछि थप उपचारका लागि हेलिकप्टरबाट काठमाडौं लगिएको चिकीत्सक टाँसी आङ्जु लामाले बताउनुभयो । अक्सिजनको मात्रा साठीमा झरेको र त्यसपछि बिरामी निक्कै आत्तिन थाल्नुभएको थियो । जिल्लामा अक्सिजन कन्र्सट्रेटरबाट अक्सिजन दिईएको बताउदै उहाँलाई निको हुने लक्षण नदेखिएकोले थप उपचारका लागि काठमाडौं लग्नुको विकल्प अस्पतालसँग नरहेको उहाँले बताउनुभयो ।
छ दिन अगाडीसम्म सामान्य देखिए पनि छ दिनपछि भने बिरामीमा समस्या आउन थाल्दा मङ्गलवारदेखि हेलिकप्टरको व्यवस्थाका लागि तयारी भएको थियो । मङ्गलबार बेलुका छ बजेतिर सिम्रिक एयरको हेलिकप्टर सिमकोट आइपुगेको थियो । बिहानै हेलिकोप्टरबाट काठमाडौं उद्धार गर्ने तयारी भएपनि पोखरायता मौसम खराब भएको कारण उडान ढिलो गरी भएको सिमकोट विमानस्थलले जनाएको छ । दुर्गममा स्वास्थ्य क्षेत्रमा सहयोगमा विगत साढे दुई वर्षदेखि गर्दै आएको निक साईमण्डको आर्थिक सहयोगमा चिकित्सक बिष्ट जिल्ला अस्पतालमा कार्यरत रहँदै आउनुभएको थियो । उहाँलेको उद्धारका लागि चार्टर गरिएको हेलिकप्टरको भाडा पनि उक्त संस्थाले व्यहोर्ने भएको छ ।