हेटौंडा,२१ पुस । मकवानपुरको भीमफेदी–कुलेखानी–काठमाडौँ सडक खण्डमा सुमो गाडी दुर्घटना हुँदा ६ जनाको मृत्यु भएको छ ।
दुर्घटनामा तीन जना घाइते भएका छन् ।भीमफेदीमा गाउँपालिका–६ जुरीखेतस्थित सडक खण्डमा सुमो गाडी दुर्घटना भएको थियो ।
जिल्ला प्रहरी कार्यालय मकवानपुरका अनुसार आइतबार साँझ काठमाडौँबाट हेटौंडातर्फ आउँदै गरेको ना १ ज १७७८ नम्बरको सुमो गाडी सडकबाट करिब १०० मिटर तल खोल्सामा खस्दा दुर्घटना भएको हो ।
घाइतेहरु नौ जनामध्य ६ जनाको हेटौंडा अस्पतालमा ल्याएपछी चिकित्सकले मृत घोषणा गरेको जिल्ला प्रहरी कार्यालय मकवानपुरका प्रहरी नायब उपरिक्षक पुस्कर बोगटीले जानकारी दिनुभयो ।
दुर्घटनाको खबर प्राप्त हुनासाथ इलाका प्रहरी कार्यालय भीमफेदीबाट खटिएको प्रहरी टोली करिब साढे ५ बजे घटनास्थलमा पुगेको थियो। सुमोमा सवार ९ जनालाई उद्धार गरी उपचारका लागि हेटौंडातर्फ पठाइएकोमा अहिले ३ जनाको उपचार भइरहेको छ ।
सुमोमा सवार ६ जना पुरुष, १ महिला, १ बालिका र १ बालक रहेका थिए । दुर्घटनाग्रस्त सुमो गाडी घटनास्थलमै रहेको छ। दुर्घटनास्थल इलाका प्रहरी कार्यालय भीमफेदीबाट करिब ३ किलोमिटर उत्तर–पूर्वमा पर्दछ। दुर्घटनाको कारणबारे थप अनुसन्धान भइरहेको प्रहरीले जनाएको छ।
मृतकको सनाखत हुन बाकी छ ।