भक्तपुर, २७ माघ । दुधपाटीस्थित शहीद धर्मभक्त राष्ट्रिय प्रत्यारोपण केन्दमा १९ औं कलेजो प्रत्यारोपण सफल भएको छ । 

केन्द्रमा पछिल्लो समय नियमित कलेजो प्रत्यारोपण हुँदै आएको छ ।

गत आईतबार माघ २१ गते मोरङ्ग, विराटनगरका ६१ वर्षिया श्रीमानलाई उनकी ५१ वर्षीया श्रीमतीले कलेजो दान दान गरेकी थिइन । नेपालमा सबैभन्दा धेरै कलेजो प्रत्यारोपण गर्ने यस केन्द्रले स्थापनाको ११ वर्ष अवधिमा  एकहजार २०३ जनाको सफल मिर्गौला प्रत्यारोपण भइएसकेको छ । त्यसमा पनि  ९९ प्रतिशत सफलताका साथ सम्पन्न गरेको छ ।  नेपालमा प्रत्यारोपण शल्य चिकित्सक डा.पुकारचन्द्र श्रेष्ठको नेतृत्वमा पहिलो कलेजो प्रत्यारोपण भएको हो ।

डा.पुकारले एक दशक अघि देखि नै मुलुकमा कलेजो प्रत्यारोपणको पूर्वाधार, जनशक्ति विकास, कानुन निर्माण गर्नमा अहभ भूमिका निर्वाह गरेका छन् । 
 डा. श्रेष्ठको नेतृत्वमा यस वर्ष मात्रै १० जनाको कलेजो प्रत्यारोपण भईसकेको छ । संसारकै सबैभन्दा न्यूनतम शुल्क १५ देखि २० लाखमा कलेजो प्रत्यारोपण गरी रहेको केन्द्रले जनाएको छ  जसले केन्द्रमा आएर उपचार गराउने बिरामीहरूको संख्या दिनानुदिन बढ्दै गएको छ ।  
केन्द्रले पछिल्लो केही कलेजो प्रत्यारोपणमा एक जना भारतीय विशेषज्ञको उपस्थित रहे पनि उनको भूमिका अकस्मात् देखिन सक्ने जटिलता नियन्त्रण गरी विज्ञहरूलाई थप हौसला प्रदान गर्नु बाहेक खाँसै नरहेको समेत बताइएको छ ।

आफ्नो नाममा एक इन्च पनि कुनै जग्गा र भवन नभए पनि यस केन्द्रले नेपालको प्रत्यारोपणको ७० देखि ८० प्रतिशत  हिस्सा ओगटेको छ । 
केन्द्रमा भएको पछिल्लो कलेजो प्रत्यारोपण सँगै देश भरीमा ४ वटा केन्द्र मार्फत हाल सम्म ३९ जनाको कलेजो प्रत्यारोपण भइसकेको छ ।

केन्द्रमा मुलुकमै पहिलो पटक डा.पुकार कै नेतृत्वमा मस्तिष्क मृत्यु भएको दाता वाट प्राप्त कलेजोलाई अन्य व्यक्ति मा प्रत्यारोपण गरिएको थियो । हाल सम्म मस्तिष्क मृत्यु भएका दाता वाट प्राप्त कलेजो तिन जनामा प्रत्यारोपण  गरिसकिएको छ ।  
केन्द्रले देशको सात वटै प्रदेशमा मिर्गौला प्रत्यारोपण तथा डाइलाइसि सेवा विस्तार गर्ने  नेपाल सरकारको योजनामा महत्वपूर्ण भूमिका निर्वाह गर्दै आएको छ । यसका लागि आवश्यक दक्ष जनशक्ति उत्पादन गर्ने कार्य भै रहेको छ भने प्रत्यारोपण फेलोसिप कार्यक्रम सञ्चालन गर्नको लागि अन्तिम तयारी पुरा भएको छ ।