काठमाडौँ, १० मंसिर । नेपाल रेडक्रस सोसाइटीद्धारा सञ्चालित केन्द्रीय रक्तसञ्चार सेवा केन्द्रको (ब्लड बैंक) सेवा  आजबाट पुन: प्रदर्शनीमार्ग बाट दिन सुरु गरेको छ ।

१२ बैशाख २०७२ को महाभूकम्पबाट क्षति पुगेपछि प्रदर्शनीमार्गबाट ललितपुरको बालकुमारी र काठमाडौँको ताहचल सरेको थियो ।
भूकम्पले क्षति पुगेको पुरानो संरचना हटाएर थाइ रेडक्रसको सहयोगमा बनेको प्रदर्शनी मार्गको नयाँ भवनमा रेडक्रस केन्द्रीय कार्यालय ताहचल हाता भित्रको ब्लड बैंक प्रदर्शनीमार्गमा सरेको  हो ।

ब्लड बैंकका निर्देशक पवनकुमार गुप्ताले झन्डै  ९ वर्ष पछि  ब्लड बैंकले  प्रदर्शनीमार्गबाट सेवा दिन सुरु गरेको बताए ।

‘अब रेडक्रसद्धारा सञ्चालित ब्लड बैंक सेवा प्रदर्शनीमार्ग (भृकुटीमण्डप)को नयाँ ब्लडबैंक भवनबाट सुरु भएको छ । आजैबाट हामीले सेवा थालेका छौँ । यो ब्लड बैंक पहिलेको भन्दा अत्याधुनिक हुन्छ । यसका लागि मेसिन खरीद तथा जडानको काम केही बाँकी छ । केही महिनापछि यसको सेवा विस्तार हुन्छ । आजबाट हामीले ताहचलबाट दिईरहेको सेवा यताबाट दिन थालेका छौँ,’ निर्देशक गुप्ताले भने ।

भूकम्पले क्षति पुगेपछि ब्लड बैंक सुरुमा बालकुमारी सरेको थियो । त्यहाँ अपायक भएको गुनासो बढेपछि ताहचल सरेको थियो । प्रदर्शनी मार्गमा आएपछि भने सेवाग्राहीलाई थप सहज र सेन्टर पर्ने भएको छ ।

नेपाल रेडक्रस सोसाइटीले विसं २०२३ साल साउन १२ गते देखि रक्त सञ्चार सेवा दिन थालेको हो ।