जुम्ला। कर्णाली स्वास्थ्य विज्ञान प्रतिष्ठान जुम्लामा कार्यरत डाक्टर करण साहको नाममा पक्राउ पुर्जी जारी भएपछि आकस्मिक बाहेकका सम्पूर्ण सेवा बन्द गर्ने घोषणा गरेका छन् ।  
मंगलबार प्रेस विज्ञप्ति जारी गर्दै आजैबाट आकस्मिक बाहेकका सबै स्वास्थ्य सेवा बन्द गर्ने घोषणा गरेका छन् । 

डा.साहमाथि आक्रमण भएको सीसीटिभी फुटेजमा प्रष्टसँग देखिएको अवस्थामा झुटा मुद्दा लगाएर पक्राउ पुर्जी जारी भएको घटनाले मर्माहत भएको  चिकित्सक, स्वास्थ्यकर्मीले बताएका छन् । 

यस्तो भयपूर्ण वातावरणमा सेवा दिन सेवा दिन नसक्ने उनीहरुको भनाइ छ ।

झुटा मुद्दा फिर्ता लिएर दोषीमाथि कडा भन्दा कडा कारबाही गर्न प्रतिष्ठानका चिकित्सक, स्वास्थ्यकर्मीको माग छ। डा. साहमाथिको मुद्दा फिर्ता नभएसम्म काममा नफर्कने अडान उनीहरुले लिएका छन् । 

भदौ २ गते प्रतिष्ठानमै कार्यरत धनबहादुर शाहीले डा‍.साहमाथि कुटपिट गर्नुभएको थियो । कुटपिटपछि शाहीलाई प्रहरीले पक्राउ गरको थियो । 

छोराको उपचारका विषयमा डाक्टरसँग विवाद हुँदा शाहीले कुटपिट गरेका थिए । उनलाई ४५ दिनको लागि निलम्बित समेत गरिएको थियो ।

शाहीकी श्रीमती आशा हमाल शाहीले भने आफ्ना ६ वर्षीय छोरा पृथकविक्रम शाहीको उपचारमा साहले हिंसा गरेको भन्दै जुम्ला प्रहरीमा भदौ १३ गते  जाहेरी दिनुभएको थियो । 

यसै जाहेरीका आधारमा डा.साहको नाममा पक्राउ पूर्जी जारी गरिएको जिल्ला प्रहरी कार्यालय जुम्लाले जानकारी दिएको छ ।