काठमाडौँ, २४ असोज । पाटन स्वास्थ्य विज्ञान प्रतिष्ठानअन्तर्गतको पाटन अस्पतालमा पहिलो पटक कोर्निया प्रत्यारोपण सेवा सुरु भएको छ । विश्व दृष्टि दिवसको अवसर पारेर अस्पतालको आँखा रोग विभागले ६३ वर्षीया महिलाको कोर्निया प्रत्यारोपण गरेको हो ।

आँखाको पारदर्शी बाहिरी तह अर्थात् कोर्नियामा समस्या देखिएर दृष्टि प्रभावित भएकी महिलाको शल्यक्रिया कोर्निया विशेषज्ञ डा. अनिमा देशारको नेतृत्वमा गरिएको हो । ती महिला ‘प्सुडोफ्याकिक बुलस केराटोप्याथी’ समस्याबाट पीडित हुनुहुन्थ्यो । यो समस्या आँखामा कृत्रिम लेन्स राखिएपछि कोर्नियाको कार्यक्षमतामा असर पुग्दा देखिन सक्छ । यसले कोर्नियामा सुन्निने समस्या उत्पन्न गर्नुका साथै दृष्टि कमजोर बनाउन सक्छ ।

शल्यक्रियामा डा. देशार मुख्य शल्यचिकित्सकका रूपमा सहभागी हुनुहुन्थ्यो । साङ्गिरुवा र क्रिस्टीले शल्यक्रियामा सहयोग गर्नुभएको थियो । त्यस्तै, डा. सुमित सिंह महर्जनले रेट्रोबल्बार ब्लक विधिबाट शल्यक्रियाका लागि आवश्यक बेहोस बनाउने सेवा प्रदान गर्नुभएको थियो ।

शल्यक्रियामा रेजिडेन्ट चिकित्सकहरू डा. प्राप्ति, डा. प्रभा, डा. प्रियंका, डा. निशा र प्रदीप पटेलसहित आँखा रोग विभागका अन्य चिकित्सकहरूको सहभागिता थियो ।

अस्पतालको आँखा रोग विभाग प्रमुख डा. रञ्जना शर्मासहित डा. पवन महत, डा. निशा श्रेष्ठ राजभण्डारी र विभागका अन्य चिकित्सकले पनि कोर्निया प्रत्यारोपण सेवा सुरु गर्न महत्त्वपूर्ण योगदान पुर्‍याउनुभएको अस्पतालले जनाएको छ ।

कोर्नियामा गम्भीर क्षति पुगेर दृष्टि प्रभावित भएका बिरामीको उपचारमा प्रत्यारोपण प्रभावकारी विधि मानिन्छ । कोर्नियाको पारदर्शिता वा कार्यक्षमता गुमेका अवस्थामा उपयुक्त बिरामीलाई दाताबाट प्राप्त स्वस्थ कोर्निया प्रत्यारोपण गरेर दृष्टिमा सुधार ल्याउने प्रयास गरिन्छ ।

पाटन अस्पतालमा यो सेवा सुरु गर्न सहयोग पुर्‍याएको भन्दै अस्पतालको टोलीले नेपाल आँखा बैंक तथा आँखा दान गर्ने दाताप्रति आभार व्यक्त गरेको छ । आँखा दान गर्ने व्यक्तिको निर्णय र दाताको परिवारको सहयोगले दृष्टिसम्बन्धी समस्या भएका बिरामीको उपचारमा महत्त्वपूर्ण योगदान पुग्ने चिकित्सकहरूको भनाइ छ ।

विभाग प्रमुख डा. शर्माका अनुसार पाटन अस्पतालमा मोतिबिन्दु, जलबिन्दु, आँखाको पर्दासम्बन्धी समस्या तथा अन्य जटिल अवस्थाको उपचार र शल्यक्रिया सेवा उपलब्ध छ । कोर्निया प्रत्यारोपण सेवा थपिएसँगै अस्पतालबाट प्रदान गरिने आँखा उपचारको दायरा विस्तार भएको छ ।