काठमाडौँ, ११ असोज । बागमती प्रदेश सरकारले मुटु रोगको उपचारलाई सहज र पहुँचयोग्य बनाउन प्रदेशका अस्पतालमा विशेषज्ञ सेवा विस्तार गर्ने भएको छ ।

 हेटौँडा अस्पताल र भक्तपुर अस्पतालमा क्याथल्याबसहितको मुटु उपचार सेवा सञ्चालनका लागि बजेट विनियोजन गरिएको छ ।

विश्व मुटु दिवसका अवसरमा शनिबार ललितपुरमा आयोजित कार्यक्रममा बागमती प्रदेशका मुख्यमन्त्री किरण थापामगरले नागरिक स्वस्थ नभएसम्म मुलुकको विकास र समृद्धि सम्भव नहुने भएकाले स्वास्थ्य क्षेत्रलाई प्रदेश सरकारले उच्च प्राथमिकतामा राखेको बताउनुभयो ।

उहाँले हृदयघातजस्तो आकस्मिक अवस्थामा बिरामीलाई उपचारका लागि काठमाडौँ ल्याउनुपर्ने अवस्थाले उपचारमा ढिलाइ हुन सक्ने भएकाले प्रदेशका विभिन्न अस्पतालमा आवश्यक सेवा तथा औषधिको व्यवस्था मिलाइएको जानकारी दिनुभयो ।

मुख्यमन्त्री थापाका अनुसार सिन्धुली, रामेछाप, सिन्धुपाल्चोक, दोलखा, हेटौँडा, चितवनलगायत १० वटा अस्पतालमा आवश्यक औषधि तथा उपचार सामग्रीको व्यवस्था गरिएको छ । स्थानीय तहमै आकस्मिक मुटु उपचारको पहुँच विस्तार गर्ने उद्देश्यले अस्पतालको क्षमता बढाउने काम भइरहेको उहाँले बताउनुभयो ।

मुख्यमन्त्री थापले स्वास्थ्यसँगै शिक्षा क्षेत्रलाई पनि प्रदेश सरकारको प्रमुख प्राथमिकतामा राखिएको बताउनुभयो । स्वस्थ नागरिक निर्माणसँगै गुणस्तरीय शिक्षामा पहुँच विस्तार गर्न सके मात्र प्रदेशको समग्र विकासलाई गति दिन सकिने उहाँको भनाइ थियो ।

कार्यक्रममा रसुवामा आएको बाढीपछि प्रदेश सरकारले गरिरहेको विपद् व्यवस्थापनका कामबारे पनि उहाँले जानकारी दिनुभयो । बाढीबाट भएको क्षतिको विवरण सङ्कलन, प्रभावितलाई राहत तथा पुनर्स्थापनाका कामलाई प्राथमिकताका साथ अघि बढाइएको उहाँले बताउनुभयो ।

नदीका कोरिडोर तथा बगर क्षेत्रमा जोखिममा रहेका बस्तीलाई सुरक्षित स्थानमा स्थानान्तरण गरी व्यवस्थित पुनर्निर्माण गरिने मुख्यमन्त्री थापले जानकारी दिनुभयो ।

कार्यक्रममा वरिष्ठ मुटुरोग विशेषज्ञ डा. भगवान कोइरालाले मुटु रोगलगायत नसर्ने रोगबाट बच्न नियमित स्वास्थ्य परीक्षण आवश्यक रहेको बताउनुभयो । आफ्नो स्वास्थ्यका प्रमुख सूचकबारे नियमित जानकारी राख्ने बानीले रोगको जोखिम पहिचान र समयमै उपचारमा सहयोग पुग्ने उहाँले बताउनुभयो ।

सरकारले प्रत्येक फागुन महिनालाई नसर्ने रोगको स्वास्थ्य परीक्षण महिनाका रूपमा घोषणा गर्ने पहल सकारात्मक रहेको उल्लेख गर्दै डा. कोइरालाले रोग लागेपछि उपचार गर्नुभन्दा नियमित स्वास्थ्य परीक्षण, सन्तुलित खानपान र शारीरिक व्यायाममा ध्यान दिनुपर्ने बताउनुभयो ।

समाजको करिब एक चौथाइ जनसङ्ख्यामा कुनै न कुनै प्रकारको मानसिक समस्या देखिएको सन्दर्भ उल्लेख गर्दै उहाँले नियमित व्यायामले शारीरिकसँगै मानसिक स्वास्थ्यमा समेत सकारात्मक प्रभाव पार्ने बताउनुभयो ।