काठमाडौँ, १५ फागुन । स्वास्थ्य तथा जनसंख्या मन्त्रालयले वर्षेनी मनाउने स्वास्थ्य सेवा दिवस यो वर्ष औपचारिक रुपमा मनाएन । 

निर्वचन आचारसंहिताको कारणले यो वर्ष स्वास्थ्य सेवा दिवस नमनाएको हो । 

दिवसको अवसरमा स्वास्थ्यकर्मीहरुलाई प्रदान गरिने उत्कृष्ट स्वास्थ्य सेवा पुरस्कार निर्वाचन पछि मात्रै वितरण गर्ने स्वास्थ्य मन्त्रालयको योजना बनाएको छ । 

मन्त्रालयले सर्वोत्कृष्ट र उत्कृष्ट स्वास्थ्य सेवा पुरस्कारबाट विभिन्न स्वास्थ्यकर्मीहरुलाई पुरस्कृत गर्ने गर्दथ्यो । 

निर्वाचन आचार संहिता लागू भएकोले हाललाई उक्त पुरस्कार वितरण नगरिएको हो । 

आगामी साता अर्थात २१ फागुनका दिन देशभर प्रतिनिधि सभाका निर्वाचन हुँदैछ । 

स्वास्थ्य मन्त्रालयका प्रवक्ता डा प्रकाश बुढाथोकीले निर्वाचन सम्पन्न भएपछि रोकिएको २९ औँ स्वास्थ्य सेवा दिवस औपचारिक रुपमा मनाउने जानकारी गराउनुभयो ।

उहाँले दिवसको अवसरमा प्रदान गरिने एक लाख राशीको सर्वोत्कृष्ठ स्वास्थ्य सेवा पुरस्कारद्धारा एक जना स्वास्थ्यकर्मी र ५० हजार राशीको उत्कृष्ठ स्वास्थ्य सेवा पुरस्कारबाट चार जनालाई पुरस्कृत गरिने बताउनुभयो ।

‘निर्वाचन आचार संहिता सकिएपछि स्वास्थ्य सेवा दिवस औपचारिक रुपमा कार्यक्रम गरेर मनाईन्छ । त्यस अघि नै बार्षिक रुपमा सर्बोत्कृष्ट तथा उत्कृष्ठ स्वास्थ्यकर्मी छनौट गर्न समिति गठन हुनेछ । त्यसले गर्ने सिफारिसको आधारमा स्वास्थ्यकर्मीहरु पुरस्कृत गर्नेछौँ,’ प्रवक्ता बुढाथोकीले भन्नुभयो । 

विसं २०५३ फागुन १५ गते स्वास्थ्य सेवा ऐन प्रमाणिकरण भएको दिन हो । सोही दिनलाई हरेक वर्ष स्वास्थ्य सेवा दिवसको रुपमा मनाउने गरिन्छ ।

सर्बोत्कृष्ठ तथा उत्कृष्ठ पुरस्कारका लागि स्वास्थ्यकर्मी छनौट गर्न सरकारले मुख्यसचिवको अध्यक्षतामा छनौट समिति गठन गर्नेछ ।