काठमाडौं,१६ वैशाख । आगामी बिहीबारदेखि शनिबारसम्म चितवन मेडिकल कलेजमा सामुदायिक मानसिक स्वास्थ्य सम्बन्धी दोस्रो अन्तर्राष्ट्रिय सम्मेलन हुने भएको छ । 
नेपाल इन्स्टिच्युट अफ मेन्टल हेल्थको आयोजनामा चितवनमा सम्मेलन हुन लागेको आयोजक समितिका संयोजक अमेरीकास्थित हार्वर्ड मेडिकल स्कूलका सहप्राध्यापक मनोचिकित्सक डा श्रीधर पौडेलले जानकारी दिनुभयो ।  
नेपालमा मानसिक स्वास्थ्यको पहुँच प्रत्येक नागरिककहाँ पु¥याउने उद्देश्यले सम्मेलनको आयोजना गर्न लागिएको हो । डा.पौडेलले नेपालमा वार्षिक सात हजार जनाको आत्महत्या गर्ने गरेको तथ्याङ्क प्रस्तुत गर्दै सम्मेलनले सबैको पहुँचमा मानसिक स्वास्थ्य सेवा पुगोस भन्ने लक्ष्य रहेको बताउनुभयो । यहाँ हुनेखानेहरुको मात्रै पहुँचमा मानसिक स्वास्थ्य सेवा रहेको उल्लेख गर्दै उहाँले मानसिक स्वास्थ्य हरेक नागरिककहाँ पुग्नुपर्ने बताउनुभयो । 
विदेशिएकाहरुलाई पनि मानसिक समस्या हुने गरेको उहाँको भनाई छ । 
सम्मेलनमा अमेरीकास्थित बोस्टन मेडिकल सेन्टरका प्राध्यापक डा डेभिड हेण्डर्सन, विश्व स्वास्थ्य संगठनका डा राजेश पाण्डव, ओरेक नेपालका प्रतिनिधि डा रेणु अधिकारी, मानसिक अस्पतालका डा कपिलदेव उपाध्याय वक्ताका रुपमा रहनुहुनेछ ।

आयोजक समितिका संयोजक डा पौडेलले सम्मेलनमा एक सय भन्दा बढि प्रस्तुतीकरणहरु प्रस्तुत हुने जानकारी गराउनुभयो ।  गाउँ र जिल्लामा बस्ने मानिसहरुलाई समेत मानसिक स्वास्थ्यको बारेमा जानकारी दिने उद्देश्य रहेको छ । ” सम्मेलनले मानसिक स्वास्थ्य सम्बन्धी घोषणापत्र जारी हुने आयोजकले बताएको छ ।

स्वास्थ्य तथा जनसंख्या मन्त्रालयका प्रवक्ता डा प्रकाश बुढाथोकीले सरकारले मानसिक स्वास्थ्यको क्षेत्रमा पर्याप्त लगानी गरेको बताउनुभयो । आर्थिक स्थितिले भ्याएसम्म मानसिक स्वास्थ्यको पहुँच पु¥याउन सरकार लागि परेको उहाँको भनाई छ । उहाँले सम्मेलनबाट आएका बिषय र एजेण्डाको निष्कर्ष सरकारलाई सुझाव दिने किसीमको हुनुपर्ने बताउनुभयो ।

सम्मेलनको प्रमुख अतिथि भरतपुर महानगरपालिकाका मेयर रेणु दाहाल, विशिष्ट अतिथिका रुपमा स्वास्थ्य तथा जनसंख्या मन्त्रालयका सचिव डा विकास देवकोटा रहनुहुनेछ । सम्मेलनमा समुदायमा भएका मानसिक स्वास्थ्य सम्बन्धी कार्यक्रमको कार्यान्वयनबारे छलफल हुने आयोजकले जनाएको छ ।
पत्रकार सम्मेलनमा नर्वेमा कार्यरत अनुसन्धानकर्ता डा. सुरज थापा, केन्द्रीय कारागार अस्पतालका मानसिक रोग विभाग प्रमुख डा. सुनिल रेग्मी लगायतको उपस्थिति थियो ।  

यसअघि पहिलो सामुदायिक मानसिक स्वास्थ्य सम्बन्धी अन्तर्राष्ट्रिय सम्मेलन जुम्लामा भएको थियो ।