काठमाडौं,२६ असार  । बीएण्डसी मेडिकल कलेज एण्ड रिसर्च सेन्टरको अनुगमन टोलीमा रहनुभएका डा. भोजराज अधिकारी उक्त टोलीबाट बाहिरिएसंगै उक्त समितिले आयोगलाई प्रतिवेदन नबुझाउने भएको छ ।   
 
 अनुगमन समितिका सदस्य डा. भोजराज अधिकारीले आफ्नो नाम जोडिएर विभिन्न सञ्चारमाध्यम र सामाजिक सञ्जालमा समाचारहरु आएकाले नैतिकताका आधारमा आफु अनुगमन टोलीमा संलग्न हुन नसक्ने लिखित जवाफ चिकित्सा आयोग कार्यकारी समितिलाई दिनुभएको छ । उहाँले विएण्डसीको प्रतिवेदन बुझाउन नसक्ने बताउनुभएको छ । चिकित्सा शिक्षा आयोग कार्यकारी समितिलाई पत्र लेख्दै अनुगमनमा आफ्नो कुनै पनि इन्ट्रेस्ट नहुँदा नहुँदै आफ्नो नाम जोडिएकाले उक्त टोलीबाट भए गरेका कामको प्रतिवेदन आफुले बुझाउन नसक्ने बताउनुभएको छ । अनुगमन गरेको तीनसाता बितिसक्दा पनि प्रतिवेदन बुझाउन नसक्दा बीएण्डसीको सम्वन्धन प्रक्रिया अलपत्र परेपछि अस्पतालका सञ्चालक दुर्गा पर्साइले प्रधानमन्त्री स्वंयमलाई सम्बन्धन दिन या बन्द गर्न आग्रह गर्नुभएको थियो ।  आयोगका उपाध्यक्ष प्राडा.श्रीकृष्ण गिरी र बीएण्डसीका सञ्चालक प्रसाईबीचको विवादमा अदालतमा डा.अधिकारी साक्षी बस्नुभएको थाहा पाएपछि ‘कनफ्लिक्ट अफ इन्ट्रेस्ट’ हुन सक्ने भन्दै अनुगमन टोलीका संयोजक डा.प्रकाशराज पाण्डेले आयोगको कार्यकारी समिति बैठकमा प्रतिवेदन बुझाउन मान्नु भएको छैन । डा.अधिकारीले प्राडा.गिरी र प्रसाईबीच आफ्नो कुनै लिनुदिनु नरहेको समेत आयोगलाई पठाउनु भएको पत्रमा उल्लेख गर्नुभएको छ । 

चिकित्सा शिक्षा आयोगका प्रवक्ता डिल्लीराज लुइटेलले  इन्ट्रेस बाझिएपछि समितिका संयोजकले समेत प्रतिवेदन बुझाउन नसक्ने जानकारी दिएको बताउनुभयो । साउन नौ गतेदेखि आयोगले परिक्षा गर्दैछ,प्रवक्ता लुइटेलले भन्नुभयो,“त्यसपछि विएण्डसिको विषयले प्राथमिकता पाउला ।” अब आयोग परिक्षामा केन्द्रीत हुने भन्दै दुईजनाको इगोका कारण समस्या भएको बताउनुभयो । उहाँले दुई व्यक्तिको इगोको कारण सबैलाई समस्या भएको गुनासो गर्नुभयो ।