काठमाडौँ, ३१ भदौ । भास्कुलर रोगको उपचारमा विकसित नयाँ प्रविधि, अनुसन्धान र उपचार अनुभवबारे विश्वका विशेषज्ञबीच ज्ञान आदानप्रदान गराउने उद्देश्यले दोस्रो हिमालय इन्टरनेशनल भास्कुलर समिट (हिमभास–२०२७) काठमाडौँमा आयोजना हुने भएको छ ।

आगामी चैत ३ देखि ७ गतेसम्म सञ्चालन हुने सम्मेलनमा सयभन्दा बढी मुलुकका विशेषज्ञ चिकित्सक तथा वैज्ञानिकलाई सहभागी गराउने तयारी गरिएको आयोजकले जनाएको छ । सम्मेलनमा नेपालीसहित एक हजारभन्दा बढीको सहभागिता रहने छ ।

ललितपुरमा सोमबार आयोजित पत्रकार सम्मेलनमा सम्मेलनका संयोजक एवं वरिष्ठ भास्कुलर शल्यचिकित्सक डा. सन्दीपराज पाण्डेयले विश्वका विभिन्न मुलुकमा भास्कुलर उपचारका क्षेत्रमा भइरहेका नयाँ अभ्यास र अनुसन्धानलाई नेपालमा प्रस्तुत गराउने उद्देश्यले सम्मेलन आयोजना गर्न लागिएको बताउनुभयो ।

उहाँका अनुसार हालसम्म ६० भन्दा बढी मुलुकबाट विशेषज्ञले सम्मेलनमा सहभागी हुने प्रतिबद्धता जनाइसकेका छन् ।

प्रत्यक्ष रूपमा सहभागी हुन नसक्ने चिकित्सक, अनुसन्धानकर्ता तथा विद्यार्थीलाई विद्युतीय माध्यमबाट सम्मेलनमा जोड्ने तयारी पनि गरिएको छ ।

सन् २०२४ मा काठमाडौँमै आयोजना भएको हिमभासको पहिलो संस्करणमा ४३ मुलुकका विशेषज्ञसहित करिब ३५० जनाको सहभागिता रहेको थियो । पहिलो सम्मेलन तीन दिन सञ्चालन गरिएकोमा यसपटकको कार्यक्रम पाँच दिनसम्म सञ्चालन गरिनेछ ।

सम्मेलनमा भास्कुलर शल्यचिकित्सा, मुटु शल्यचिकित्सा, मुटुरोग, भास्कुलर उपचारमा विशेषज्ञता हासिल गरिरहेका चिकित्सक, आवासीय चिकित्सक, नर्स तथा स्वास्थ्य सेवासँग सम्बन्धित अन्य जनशक्तिको सहभागिता रहनेछ ।

भास्कुलर चिकित्सा मानव शरीरका विभिन्न रक्तनलीसँग सम्बन्धित रोगको पहिचान, उपचार तथा शल्यक्रियासँग सम्बन्धित चिकित्सा विधा हो । 
डा. पाण्डेयले यस क्षेत्रमा उपचारका नयाँ प्रविधि र पद्धति तीव्र रूपमा विकास भइरहेकाले विशेषज्ञबीच नियमित ज्ञान आदानप्रदान आवश्यक रहेको बताउनुभयो ।
चिकित्सा विज्ञान स्थिर विषय होइन । नयाँ अनुसन्धान र प्रविधिसँगै उपचारका विधि पनि परिवर्तन भइरहेका छन् । विश्वका विभिन्न ठाउँमा भइरहेको अनुसन्धान र उपचारको अनुभवलाई एकै ठाउँमा ल्याएर छलफल गर्ने अवसर सम्मेलनले दिनेछ, डा. पाण्डेयले भन्नुभयो ।

सम्मेलनमा भास्कुलर उपचारसँग सम्बन्धित करिब ३०० भन्दा बढी कार्यपत्र तथा पोस्टर प्रस्तुत गर्ने तयारी गरिएको छ । प्रस्तुत कार्यपत्रमाथि छलफल र अनुभव आदानप्रदानसँगै उपचारमा प्रयोग भइरहेका नवीन प्रविधिका विषयमा समेत विज्ञबीच अन्तक्र्रिया हुनेछ ।

चिकित्सा पर्यटनको सम्भावना

हिमभासलाई चिकित्सा ज्ञान र सीप आदानप्रदान गर्ने थलोका रूपमा मात्र नभई नेपालको स्वास्थ्य सेवा र चिकित्सा पर्यटनलाई अन्तर्राष्ट्रिय समुदायमाझ पुर्‍याउने माध्यमका रूपमा पनि उपयोग गर्ने तयारी गरिएको छ ।

डा. पाण्डेयले पहिलो सम्मेलनमा सहभागी विदेशी विशेषज्ञमध्ये ४० भन्दा बढीले कार्यक्रमपछि नेपालको पर्यटकीय क्षेत्रको भ्रमण गर्नुभएको जानकारी दिनुभयो । यसपटक पनि सम्मेलनमा सहभागी हुने विदेशी चिकित्सक तथा उहाँहरूका परिवारका सदस्यले नेपालमा केही दिन थप बिताएर पर्यटकीय क्षेत्रको भ्रमण गर्ने योजना बनाएको उहाँले बताउनुभयो ।

स्वास्थ्यसँगै नेपालको पर्यटन प्रवद्र्धनमा पनि यस्ता कार्यक्रमले योगदान पुर्‍याउँछन् । सम्मेलनका लागि नेपाल आएका चिकित्सकले यहाँको स्वास्थ्य सेवा र पर्यटकीय सम्भावनाबारे प्रत्यक्ष जानकारी पाउनल्ने  उहाँको भनाइ छ ।

डा. पाण्डेयका अनुसार पहिलो हिमभासपछि नेपालमा उपचारका लागि आउने विदेशी बिरामीको सङ्ख्यामा समेत वृद्धि भएको छ । उहाँले पहिलो सम्मेलनपछि विभिन्न मुलुकबाट ३०० भन्दा बढी विदेशी बिरामी उपचारका लागि आफ्नो सम्पर्कमा आएको जानकारी दिनुभयो ।

उहाँले भारत, भुटान र बङ्गलादेशसँगै मध्यपूर्व, मलेसिया, इन्डोनेसिया, टर्की तथा युरोपका केही मुलुकबाट समेत उपचारका लागि नेपाल आउन थालेको  बताउनुभयो ।

नेपालमा उपलब्ध उपचार सेवा, दक्ष जनशक्ति र तुलनात्मक रूपमा कम खर्चमा हुने उपचारबारे अन्तर्राष्ट्रियस्तरमा जानकारी विस्तार गर्न यस्ता सम्मेलन उपयोगी हुने उहाँको भनाइ छ ।

हिमालय क्षेत्रलाई जोड्ने पहल

हिमालय क्षेत्रसँग सम्बन्धित मुलुकलाई समेटेर भास्कुलर चिकित्सा क्षेत्रमा सहकार्य र ज्ञान आदानप्रदान गर्ने अवधारणाअनुसार हिमभासको सुरुवात गरिएको हो । सम्मेलनको अवधारणाकर्ता पनि डा. पाण्डेय नै हुनुहुन्छ ।

उहाँले नेपालजस्तो मुलुकमा आयोजना हुने अन्तर्राष्ट्रिय सम्मेलनमा अमेरिका, बेलायत, अस्ट्रेलिया, इटाली, फ्रान्स, जापान, चीन, भारत, संयुक्त अरब इमिरेट्सलगायत विकसित मुलुकका विशेषज्ञ सहभागी हुनु सम्मेलनको अर्को विशेषता रहेको  बताउनुभयो ।

बङ्गलादेश, पाकिस्तान, भुटान, श्रीलङ्का, फिलिपिन्स, थाइल्यान्ड, मलेसिया, सिङ्गापुर, टर्की, अस्ट्रिया, कोलम्बिया, इजिप्ट, हङकङ, स्विडेन र ओमानलगायत मुलुकका विशेषज्ञले पनि सहभागिता सुनिश्चित गरेको आयोजकले जनाएको छ ।

सम्मेलन व्यवस्थापनको जिम्मेवारी पाएको इभेन्टिक नेपालका पेशल भट्टराईले यसपटकको सम्मेलन पहिलो संस्करणभन्दा ठूलो र अन्तर्राष्ट्रियस्तरमा नेपालको स्वास्थ्य सेवा परिचित गराउने अवसरका रूपमा रहने बताउनुभयो ।

उहाँले अन्तर्राष्ट्रिय विशेषज्ञलाई नेपालमा आमन्त्रण गरी यहाँको स्वास्थ्य सेवा, दक्ष चिकित्सक तथा उपचार क्षमताबारे जानकारी गराउँदा चिकित्सा क्षेत्रसँगै पर्यटन प्रवद्र्धनमा समेत योगदान पुग्ने विश्वास व्यक्त गर्नुभयो ।