काठमाडौं ।  नेपाल औषधी व्यवसायी संघले औषधिको मुल्य वृद्धिमा संघको कुनै पनि हात नहुने प्रष्ट पारेको छ । 
आज एक विज्ञप्ती जारी गर्दै संघले संघको तर्फबाट आफूखुसी औषधिको मूल्यवृद्धि नभएको बताएको छ । 
संघका अध्यक्ष मृगेन्द्र मेएर श्रेष्ठले औषधिको मुख्य वृद्धिमा व्यवसायीको कुनै पनि भूमीका नहुने जानकारी गराउनुभयो । उहाँले केही मिडियाले औषधि वृद्धिमा संघको ठूलो भूमीका रहेको भनि प्रकाशन तथा प्रशारण गरेकोमा त्यसको भत्र्सना गर्नुभयो । 
 संघले विज्ञप्ती जारी गर्दै केही सञ्चार माध्यमहरुमा औषधिको मूल्यवृद्धि सम्बन्धी समाचारहरु आइरहेको भन्दै त्यसमा औषधी व्यवसायीहरुको समेत नाम जोडिएकोमा संघको गम्भीर ध्यानाकर्षण समेत भएको जनाएको छ । 
संघका अध्यक्ष  श्रेष्ठले औषधि ऐन, २०३५ मा आवश्यक देखेमा नेपाल सरकारबाट औषधिको मूल्य निर्धारण गर्ने व्यवस्था भएकोले व्यवसायीहरुले आफूखुसी औषधिको मुल्य तोक्ने अधिकार नहुने बताउनुभयो । उहाँले औषधि ऐन अनुसार हाल देशमा ९६ प्रकारका  औषधिहरुको  मूल्य निर्धारण गरिएको भन्दै नेपाल सरकारले मूल्य निर्धारण गरेका बाहेक अन्य औषधिहरुको मूल्य उत्पादक आफैले निर्धारण गर्ने संसारभरिको प्रचलन रहेको बताउनुभयो । 
नेपालमा आयात गरिने औषधिहरुमा सरकारले तोकेको बाहेक अन्यमा उत्पादक कम्पनिले, उत्पादित देशमा भन्दा एमआरपी बढी नहुने गरि आयात गरिरहेको जानकारी पनि उहाँले दिनुभयो । विद्यमान कानूनी व्यवस्था र यथार्थताभन्दा टाढा रहेर प्रकाशन तथा प्रसारण भएका समाचारमा सत्यता नभएको संघले जनाएको छ । संघले औषधिजस्तो अति संवेदनशील विषयमा समाचार सम्प्रेषण गर्दा गम्भीर अध्ययन, खोज र विश्लेषण गरिदिनु हुन अनुरोध गरेको छ ।